Aurten ere, Adi Adian programa BAMen. Biktimak hezitzaile, eta bakearen eta bizikidetzaren eraikitzaile.
Begoñako Andra Mari Irakasleen Unibertsitate Eskolako Lehen Hezkuntzako graduetako ikasleak ADI ADIAN programan parte hartzen ari dira. Eusko Jaurlaritzaren Bake eta Bizikidetza Planaren esparruan, programa honen helburua da ikasgelan elkarrizketarako espazioak sortzea biktimen esperientziatik abiatuta, gure azken historiara hurbiltzeko, sufrimendua onartzeko, indarkeria gizartean deslegitimatzen laguntzeko eta bakea eta bizikidetza eraikitzeko.
Jarduera hori, Pastoralaren Alorrak bultzatuta eta Antropologia eta Gizartea eta Eskola irakasgaien curriculumean integratuta, hiru unetan garatzen da: lehenengoan, BAMeko irakasleekin batera, testuinguru historiko eta etiko bat egiten dute giza eskubideen ikuspegitik; bigarrenean, biktima baten testigantza entzuten dute; eta hirugarrenean, testigantzaren oihartzunak jasotzen dituzte, maila pertsonaleko esperientzian sakonduz. Prozesu horretan Galo Bilbaoren laguntza izaten dugu (Bilboko elizbarrutiko Bake eta Adiskidetze arduraduna).
Aurten, haien testigantza partekatu dute ikasgelan Nerea Barriosek, José Luis Barrios Capetilloren alabak (1988ko irailaren 17an hil zuen ETAk Santurtzin), Asier Gonzálezek, Yolanda Gonzálezen nebak (1980ko otsailaren 1ean hil zuten Madrilen Fuerza Nuevako kideek) eta Amaia Etxanizek (1980ko abuztuaren 30ean hil zuen Batallón Vasco Españolek). Haien testigantzan gogoan izan dituzte maite dituzten pertsonak hil ondorengo sufrimendu-urteak, ikaskuntza, bilaketak eta galera horrekin gorrotorik gabe bizitzeko izan dituzten prozesuak, eta beren esperientzia partekatzeko hartu duten konpromisoa memoria egiteko eta gertatu zena gogoratzeko, horrela bakeari eta bizikidetzari lagunduz.
Eskerrak, enpatia, erresilientzia, sakrifizioa, injustizia, gainditzea, ilusioa, indarra, balioa… horiek izan dira ikasleek biktimei beren lekukotzaren ondoren itzuli dizkieten hitzetako batzuk.
Parte hartu duten ikasleek eta irakasleek eskerrak eman dizkiete Nerea, Asier eta Amaiari, eskuzabaltasun eta ausardiagatik, minaren eta gainditzearen lekukotza partekatzeagatik. Testigantza horrek eragin pedagogikoa du indarkeriaren deslegitimazioan eta bizitzeko eskubidearen eta giza eskubideen balioan. Batez ere BAM bezalako unibertsitate batean, non etorkizuneko hezitzaileak izango diren gazteak prestatzen baitira. Esperientzia horri esker, sufrimenduarekin enpatizatzen lagunduko duten jarrerak eta balioak barneratuko dituzte lanbidean, eta bakea, oroimena eta bizikidetza bultzatuz eta ikasgelatik demokraziarako hezten lagunduz.
